JARROHLIKDAN KEYINGI QORIN BO‘SHLIG‘I BITISHMALARINING SHAKLLANISH MEXANIZMLARI VA ULARNING OLDINI OLISHNING ZAMONAVIY YONDASHUVLARI

Аннотация

Jarrohlik amaliyotidan keyin qorin bo‘shlig‘i a’zolari yoki ularning yuzalari orasida biriktiruvchi to‘qimali bitishmalar shakllanishi mumkin. Ushbu holat ayrim bemorlarda ichak tutilishi, surunkali qorin og‘rig‘i va takroriy operatsiyalar vaqtida texnik qiyinchiliklar bilan bog‘liq bo‘ladi. Bitishmalarning rivojlanishida qorin pardasi mezoteliy qavatining shikastlanishi, yallig‘lanish reaksiyasi, fibrin to‘planishi, fibrinoliz jarayonining susayishi va kollagenli matriks hosil bo‘lishi muhim ahamiyatga ega. Mazkur maqolaning maqsadi operatsiyadan keyingi bitishmalarning hujayraviy va molekulyar mexanizmlarini tahlil qilish hamda ularning oldini olishga qaratilgan zamonaviy yondashuvlarni umumlashtirishdan iborat. Adabiyotlar tahlili jarrohlik texnikasini takomillashtirish, to‘qimalarning shikastlanishini kamaytirish va maxsus to‘siq materiallaridan foydalanish bitishmalar xavfini pasaytirishga yordam berishi mumkinligini ko‘rsatadi. Shu bilan birga, profilaktik usulni tanlash operatsiya turi, klinik holat va mavjud ilmiy dalillarga asoslanishi lozim.